Á hverju ári þann 22. apríl sameinast heimsbyggðin um að minnast og fagna jörðinni okkar. En Jarðardagurinn er ekki aðeins táknrænn. Hann kallar á dýpri hugsun og skýrari aðgerðir og það er einmitt þar sem staðlar stíga fram sem ósýnilegar hetjur sjálfbærrar þróunar.
Á tímum loftslagsbreytinga, rýrnun náttúruauðlinda og vaxandi krafna um sjálfbærni, er mikilvægara en nokkru sinni fyrr að hafa skýran ramma til að byggja á. Alþjóðlegir staðlar veita slíkan ramma, hlutlausan, gagnsæjan og samræmdan sem gerir einstaklingum, fyrirtækjum og stjórnvöldum kleift að vinna markvisst að breytingum.
Á alþjóðavísu gegna ISO staðlar lykilhlutverki í að móta betri framtíð. Þeir hjálpa okkur að mæla, stjórna og bæta – allt frá kolefnisfótspori og orkunotkun yfir í hringrásarhagkerfi, líffræðilega fjölbreytni og sjálfbæra innviði.
Staðlar snerta ekki aðeins iðnað og framleiðslu – heldur líka skipulag borga, flutninga, vatns- og loftgæði, úrgangsstjórnun og margt fleira. Þeir eru stoðir þess sem við köllum samfélagslega innviði sjálfbærni. Án þessara stoða verður sjálfbær þróun óstöðug og illa mælanleg.
Hjá Staðlaráði Íslands vinnum við daglega að því að aðlaga, þýða og innleiða alþjóðlega staðla á íslenskan veruleika. Við tökum virkan þátt í alþjóðlegri þróun staðla innan ISO og CEN og tryggjum þannig að Ísland sé hluti af lausninni.
Við hvetjum fyrirtæki, opinberar stofnanir og einstaklinga til að kynna sér hvernig staðlar geta orðið hluti af þeirra aðgerðum – og styrkt baráttuna fyrir betri jörð.
Lestu meira um umhverfismál og staðla á vef ISO
