Reynslusaga: Ávinningur GG Verks af vottuðu gæðakerfi 21.11.18

Þegar ég kom inn í GG Verk árið 2014 byrjaði ég eins og margir nýir framkvæmdastjórar á að greina ytri og innri aðstæður. Mér var efst í huga að okkur tækist að skapa samkeppnisforskot á fremur einsleitum markaði og tryggja gæði og öryggi starfsmanna. Síðast en ekki síst vildi ég tryggja að starfsumhverfið væri þroskandi fyrir alla, að við lærðum fljótt af mistökum og fyndum jafnvel leiðir til að fyrirbyggja þau.

Sama ár stóð byggingargeirinn frammi fyrir því að þurfa að innleiða einhverskonar gæðakerfi sem stæðist kröfur Mannvirkjastofnunar. Þegar ég skoðaði samkeppnis-aðila, þá sá ég að aðeins eitt íslenskt byggingarfyrirtæki var með vottað gæðastjórnunarkerfi samkvæmt ISO 9001. Við tókum þá ákvörðun um að hefja strax innleiðingu gæðastjórnunarkerfis, og þrátt fyrir hrakspár og temmilegan ótta okkar sjálfra, þá fengum við kerfið vottað átta mánuðum síðar, eða í október 2015. 

Brynhildur S. BjornsdottirBrynhildur S. Björnsdóttir,
framkvæmdastjóri GG Verks.

Fyrirtækjamenning: Forysta, traust og frelsi til að gera mistök

Grunnforsenda þess að vel takist til í innleiðingarferlinu er sú að allir stjórnendur sjái ávinninginn í því að hefja ferlið og gefi sig alla í verkefnið frá upphafi. Að þeir setji sér vörður og geri áætlun um hvernig innleiðingin skuli fara fram. Því eftir höfðinu dansa limirnir.

Önnur forsenda er sú að allir millistjórnendur séu með í ferlinu og fái þjálfun og fræðslu frá upphafi. En öll heimsins þekking og fræðsla er þó einskis virði ef fyrirtækjamenningin styður ekki við verkefnið. Við eyddum því ómældum tíma í að sannfæra millistjórnendur um að kerfið væri ekki gert til þess að finna sökudólga eða hanka einn né neinn, heldur þvert á móti. Við myndum öll gera mistök í ferlinu en kerfið væri fyrst og fremst gert til að greina mistökin og að við lærðum af þeim saman. Því kjarninn og inntakið í ISO 9001 er að vera sífellt að bæta sig, tilkynna frávik, greina þau og læra af þeim. En til þess að starfsfólk sé tilbúið að tilkynna eigin frávik eða samstarfsmanna, þarf að ríkja fullkomið traust til yfirmanna og eigenda fyrirtækisins. Án þess fellur kerfið um sjálft sig.

Starfsmenn úr 20 í 80 og velta aukist um 172%

Fyrir utan að hafa skapað okkur sérstöðu á annars einsleitum markaði þá hefur orðið mælanlegur ávinningur eftir að við komum okkur upp vottuðu gæðakerfi. Við höfum stóraukið starfs- og viðskiptavinaánægju um leið og við höfum fækkað öryggisfrávikum og haldið 100% skilum á verkefnum innan tímaramma. Á sama tíma hefur starfsmönnum fjölgað úr 20 í 80 og við höfum aukið veltu fyrirtækisins um 172%. 

Eftir þessa reynslu getum við óhikað mælt með því að nota staðalinn sem hluta af stefnumörkun fyrirtækja. Ávinningurinn er ótvíræður. Eins er staðallinn mjög gott verkfæri til að auðvelda stækkun, en það hefði verið nær ómögulegt fyrir okkur að ná að halda jafn vel utan um þá stækkun sem við höfum gengið í gegnum undanfarin ár, án þess að vera með samræmt og staðlað kerfi sem allir skilja og ganga að allstaðar í fyrirtækinu. Svo ekki sé minnst á ávinning þess að hugarfar starfsfólks endurspeglar nú orð Henry Ford: "Quality means doing it right when no one is looking."

Staðlaráð Íslands    Þórunnartúni 2, 3. hæð, 105 Reykjavík    Kennitala: 591193 2019    Opnunartími    Sími 520 7150 fax 520 7171

Þessi síða notar vefkökur (e. cookies).

Nánari upplýsingar

Samþykkja